பெருந்தோட்ட தொழிலாளர்களுக்கான கோதுமை மானியம்

நாட்டில் ஏற்பட்ட பொருளாதார நெருக்கடியினால் பல்வேறு தரப்பினரும் பாதிப்புகளை எதிர்கொண்ட நிலையில் பெருந்தோட்ட தொழிலாளர்களும் அதிக பாதிப்பினை எதிர்கொண்டனர். அத்துடன் கோதுமை மாவின் விலை அதிகரிப்பானது அவர்களின் உணவு தேவையிலும் தாக்கத்தை செலுத்தியது. இந்நிலையில் அரசாங்கத்தினால் பெருந்தோட்ட தொழிலாளர்களுக்கு மானிய முறையில் கோதுமை மாவினை விநியோகிப்பதற்கான நடவடிக்கை மேற்கொள்ளப்பட்டது. அப்போது உள்ளுர் சந்தையில் கோதுமை மா ஒரு கிலோ 145 ரூபாவாக காணப்பட்ட நிலையில் அதனை 65 ரூபாவுக்கு மானிய விலையில் வழங்குவதற்கு அரசாங்கம் தீர்மானித்திருந்தது.

'பொதுமக்கள் முகங்கொடுப்பதற்கு நேரிட்டுள்ள பொருளாதார சிரமங்களைக் குறைப்பதற்கான முன்மொழிவுகளை நடைமுறைப்படுத்தல்' எனும் தலைப்பில் சமர்ப்பிக்கப்பட்ட அமைச்சரவைப் பத்திரத்திற்கான முன்மொழிவுகள் 2022 ஜனவரி மாதம் 18 ஆம் திகதி இடம்பெற்ற அமைச்சரவைக் கூட்டத்தில் அங்கீகாரம் வழங்கப்பட்டிருந்தது. குறித்த முன்மொழிவுகளில் தோட்டத் தொழிலாளர்களின் குடும்பங்களுக்கு கோதுமை மா நிவாரணம் வழங்குதல் தொடர்பான யோசனை வர்த்தக அமைச்சரின் தலைமையிலான குழு கவனத்தில் கொண்டு பரிந்துரைகளைச் சமர்ப்பித்துள்ளது. அப்பரிந்துரைகளின் பிரகாரம் அடையாளம் காணப்பட்டுள்ள 115,867 பயனாளிக் குடும்பங்களுக்கு மாதாந்தம் 15 கிலோகிராம் கோதுமை மா சலுகை விலையில் வழங்குவதற்காக வர்த்தக அமைச்சர் சமர்ப்பித்த யோசனைக்கு அமைச்சரவை அங்கீகாரம் வழங்கியிருந்தது.

நிதி அமைச்சு, வர்த்தக அமைச்சு, தோட்ட வீடமைப்பு மற்றும் சமூக  உட்கட்டுமான   இராஜாங்க அமைச்சு மற்றும் கூட்டுறவு சேவைகள் , சந்தைப்படுத்தல்  அபிவிருத்தி  மற்றும் நுகர்வோர் பாதுகாப்பு இராஜாங்க அமைச்சு ஆகியன ஒன்றாக இணைந்து  அரசாங்கத்தின் நிகழ்ச்சித்திட்டத்தின்  கீழ் வாழ்க்கைச் செலவுப் பிரச்சினைகளுக்கு பல்வேறு  சமூகத் தீர்வுகளை  வழங்கும் வகையில் இத்திட்டம் முன்னெடுக்கப்பட்டது. பெருந்தோட்ட தொழிலாளர்களுக்கு மானிய முறையில் கோதுமை மா வழங்கும் நடவடிக்கை அந்தந்தப் பிரதேசங்களிலுள்ள கூட்டுறவுச் சங்கங்களின் ஊடாக கோதுமை  மேற்கொள்ள நடவடிக்கை மேற்கொள்ளப்பட்டதுடன் 2022, பெப்ரவரி 20 ஆம் திகதி தலவாக்கலையிலுள்ள மடக்கும்புர தோட்டத்தில் இதன் வைபவ ரீதியான  ஆரம்ப நிகழ்வு நடைபெற்றது.

எனினும் வாழ்க்கைச் செலவை குறைக்கும் வகையில் நிவாரணம் வழங்கப்படாமல் அவர்களை அவஸ்தைக்குள்ளாகும் வகையில் கோதுமை நிவாரணம் வழங்கப்பட்டதாக பல்வேறு தரப்பினராலும் குற்றச்சாட்டு முன்வைக்கப்பட்டது. அத்துடன் தொடர்ச்சியாக நிலவிய அரசியல் நெருக்கடிகளின் காரணமாக குறித்த மானிய திட்டம் பாதியிலேயே கைவிடப்பட்டது. தொடர்ந்தும் அவற்றை முன்னெடுப்பதற்கு எவ்வித நடவடிக்கையும் மேற்கொள்ளப்படவில்லை.

இந்நிலையில் பெருந்தோட்ட தொழிலாளர்களுக்கு மானிய முறையில் கோதுமை மா வழங்கும் திட்டம் தொடர்பில் தகவல் அறியும் உரிமைச்சட்டத்தின் மூலம் நகர அபிவிருத்தி மற்றும் வீடமைப்பு அமைச்சிடமிருந்து (தோட்ட வீடமைப்பு மற்றும் சமூக  உட்கட்டுமான   இராஜாங்க அமைச்சு - SMECHC1/2/4/4/RTI-2022) பெற்றுக்கொள்ளப்பட்ட தகவல்களின் அடிப்படையில் குறித்த கட்டுரை எழுதப்படுகின்றது. 

பெருந்தோட்ட தொழிலாளர்களுக்கு மானிய முறையில் கோதுமை மா வழங்கும் திட்டத்தில் இவ்வருடம் ஜனவரி மாதம் 317 பெருந்தோட்டங்களைச் சேர்ந்த 63,974 குடும்பங்களுக்கு 959,610 கிலோ கோதுமை மா பகிர்ந்தளிக்கப்பட்டுள்ளது. இவற்றில் மத்திய மாகாணத்தில் 147 பெருந்தோட்டங்களிலுள்ள 39,503 குடும்பங்களுக்கு 592,545 கிலோ கோதுமை மாவும் ஊவா மாகாணத்தில் 38 பெருந்தோட்டங்களைச் சேர்ந்த 9500 குடும்பங்களுக்கு 142,500 கிலோ கோதுமை மாவும் மானிய விலையில் வழங்கப்பட்டுள்ளது.

தென் மாகாணத்தில் 21 பெருந்தோட்டங்களைச் சேர்ந்த 2844 குடும்பங்களுக்கு 42,660 கிலோ கோதுமை மாவும் சப்ரகமுவ மாகாணத்தில் 83 பெருந்தோட்டங்களை சேர்ந்த 9101 குடும்பங்களுக்கு 136,515 கிலோ கோதுமை மாவும் மேல் மாகாணத்தில் 28  பெருந்தோட்டங்களை சேர்ந்த 3026 குடும்பங்களுக்கு 45,390 கிலோ கோதுமை மாவும் வழங்கப்பட்டுள்ளது.

குறித்த திட்டத்தினை முன்னெடுப்பதற்கு நகர அபிவிருத்தி மற்றும் வீடமைப்பு அமைச்சினால் (தோட்ட வீடமைப்பு மற்றும் சமூக  உட்கட்டுமான   இராஜாங்க அமைச்சு) மாதாந்தம் 28.91 மில்லியன் ரூபா ஒதுக்கீடு செய்யப்பட்டுள்ளது. இந்த நிவாரணம் 2022 ஜனவரி மாதம் மட்டும் நடைமுறைப்படுத்தப்பட்டதுடன்  அட்டவணையில் குறிப்பிடப்பட்டுள்ள வகையில் பயனாளிகள் தெரிவு செய்யப்பட்டிருந்தனர். 2022 ஜனவரி மாதம் விநியோகிக்கப்பட்ட கோதுமை மாவின் சந்தை பெறுமதி 139,143,450 ரூபாவாகும். (அப்போதைய சந்தையில் ஒரு கிலோ கோதுமை மாவின் பொதுவான விலை 145 ரூபாவாக காணப்பட்டது. இதனடிப்படையில் விநியோகிக்கப்பட்ட மொத்த கோதுமை மாவின் அளவு 959,610 கிலோ கிராம் ஆகும்.)

இதேவேளை விநியோகிக்கப்பட்ட கோதுமை மாவின் மொத்த நிவாரணப் பெறுமதி 62,374,650 ரூபாவாகும். (ஒரு கிலோ கோதுமை மாவின் பொருட்டு தோட்ட ஊழியர்களின் குடும்பத்துக்கு உரித்தாகும் நிவாரண விலை 65 ரூபாவாகும்.)

கோதுமை மா நிவாரண நிகழ்ச்சித் திட்டம் வர்த்தக அமைச்சின் கீழுள்ள ‘வீட்டு உணவு பாதுகாப்பு நிகழ்ச்சித்திட்ட நிவாரணப்பொதி’ நிவாரண நெலவு தலைப்பின் கீழ் நடைமுறைப்படுத்தப்பட்டது. குறித்த செலவு தலைப்பின் கீழ் 15 பில்லியன் ரூபா ஒதுக்கீடு செய்யப்பட்டுள்ளது. எனினும் குறித்த திட்டம் 2022 ஜனவரி மாதம் மாத்திரம் முன்னெடுப்பதற்கான நடவடிக்கைகள் மேற்கொள்ளப்பட்டுள்ளது.

இந்த நிகழ்ச்சித்திட்டம் அமைச்சரவையால் நியமனம் செய்த குழுவின் மூலம் மேற்பார்வை செய்யப்பட்டு அதன் பரிந்துரைகள் நடைமுறைப்படுத்தப்பட்டது. அதன்படி ஒரு கிலோ கோதுமை மா 100 ரூபாவுக்கு வழங்கும் நிறுவனங்களிடம் இருந்து கொள்வனவு செய்வதற்கு அமைச்சரவை அனுமதி கிடைக்கப்பெற்றதுடன் சந்தையின் கோதுமை மாவின் விலை துரிதகதியில் அதிகரித்தமை காரணமாக கோதுமை மா வழங்கும் நிறுவனங்கள் மேற்படி விலையின் கீழ் கோதுமை மா வழங்குவதற்கு இணங்கவில்லை. ஆகையால் புதிய விலை கணக்குகளின் பொருட்டு அமைச்சரவை அனுமதி பெற்றுக்கொள்ள வேண்டிய தேவை ஏற்பட்டது. ஆயினும் அவ்வப்போது ஏற்பட்ட அமைச்சரவை திருத்தங்கள் காரணமாகவும் அதற்கமைவாக குழுவின் உறுப்பினர்களில் மாற்றங்கள் ஏற்பட்டமையாலும் புதிய விலை கணக்குகளின் பொருட்டு அமைச்சரவை அனுமதி பெற்றுக்கொள்ள தாமதமாகியமையால் இந்த நிகழ்ச்சித்திட்டத்தை இதுவரை மீண்டும் ஆரம்பிப்பதற்கான ஆற்றல் கிடைக்கப்பெறவில்லையென நகர அபிவிருத்தி மற்றும் வீடமைப்பு அமைச்சு தெரிவித்துள்ளது.

நாட்டில் தற்போது நிலவும் பொருளாதார நெருக்கடிகளுக்கு மத்தியில் பெருந்தோட்டத் தொழிலாளர்களின் 1000 ரூபா சம்பளக் கோரிக்கையும் நிறைவேற்றப்படவில்லை. இதனால் தற்போது பெற்றுக்கொள்ளும் வருமானத்துக்கு ஏற்ப குடும்ப செலவுகளை சமாளிப்பதில் பெரும் நெருக்கடியினை எதிர்கொண்டுள்ளனர். தற்போது ஒரு கிலோ கோதுமை மா விலை அதிகரிக்கப்பட்டு 250 ரூபாவுக்கும் அதிகமாக விற்பனை செய்யப்படுகின்றது. தற்போதைய சூழ்நிலையில் பெருந்தோட்ட தொழிலாளர்களுக்கு மானிய முறையில் கோதுமை வழங்கப்பட்டிருந்தால் அது அவர்களுக்கு உதவியாக அமைந்திருக்கும். கோதுமை மாவினை மானியமாக பெருந்தோட்ட தொழிலாளர்களுக்கு வழங்குவது அவர்களை அவமானப்படுத்தும் விடயமாக பலராலும் விமர்சிக்கப்பட்டாலும் பெருந்தோட்ட குடும்பங்களின் உணவுத் தேவையில் கோதுமை மாவும் பங்கு வகிக்கின்றதென்பதை மறுக்கமுடியாது. 

தற்போதைய நிலைமையில் புதிய நிவாரணத் திட்டங்களை அறிமுகப்படுத்துவதற்கு அரசாங்கம் தயாரில்லை. தமிழ்நாடு அரசாங்கம் வழங்கிய நிவாரணங்களில் அரிசி மாத்திரமே பெருந்தோட்ட மக்களுக்கு வழங்கப்பட்டுள்ளது. பால்மா வழங்கப்படுவதிலிருந்து புறக்கணிக்கப்பட்டுள்ளனர். இவ்வாறு இலவச பொருட்களையே முறையாக பகிர்ந்தளிக்காத அரசாங்கம் பெருந்தோட்ட தொழிலாளர்களுக்கு பாரிய சலுகையினை வழங்குமென எதிர்பார்க்க முடியாது. இவ்வாறான நிலையில் அரசாங்கத்தினால் வழங்கப்படும் கோதுமை மா மானியம் ஓரளவுக்கு தொழிலாளர்களுக்கு கைகொடுத்தது என்பதையும் மறுக்க முடியாது.